İşğal dövründə ermənilərin xarabalığa çevirdiyi Cəbrayıl yenidən qurulur. Sıfırdan qurulan rayon mərkəzinə ilk köçün bu ilin payızında yola salınacağı gözlənilir. İlk mərhələdə Cəbrayıl şəhərinə 712 ailə köçürüləcək.

Koordinat.az xəbər verir ki,Cəbrayıl şəhəron ümumilikdə 712 mənzili olan 33 bina inşa edilir. Mənzil İnşaatı Dövlət Agentliyi (MİNA) tərəfindən şəhərdə tikilən Cəbrayıl Yaşayış Kompleksinin ümumi sahəsi 7,87 hektar təşkil edir. Hazırda tikinti işlərinin sürətlə davam etdirildiyi həmin binalarda ümumilikdə 712 mənzil olacaq. Bir, iki, üç və dördotaqlı mənzillərin sahəsi minimum 45, maksimum 120 kvadratmetr təşkil edəcək.

Yaşayış kompleksində inşa olunan binaların 28-də hazırda dam, fasad və kosmetik işlər yerinə yetirilir. Qalan beş binada isə tikinti-quraşdırma işləri həyata keçirilir. Altı kvartaldan ibarət kompleksin inşasının tezliklə yekunlaşacağı gözlənilir. Bundan sonra inşa edilən mənzillərin işğaldan əvvəl Cəbrayıl şəhərində qeydiyyatda olmuş ailələr arasında bölgüsü aparılacaq. İlk növbətə mənzil şəraiti ağır olan ailələrin yenidən qurulmuş şəhərdə mənzillə təmin olunmasına üstünlük veriləcək.