ADR Hərəkatı: "“Əsrin müqaviləsi” işsizliyi və yoxsulluğu aradan qaldırmadı"
Koordinat.az xəbər verir ki, bu barədə Azərbaycan Demokratiya və Rifah (ADR) Hərəkatının “Əsrin müqaviləsi”nin 25-ci ildönümü ilə bağlı yaydığı bəyanatda deyilir. Bildirilir ki, bu saziş Azərbaycanın müstəqilliyinin qorunması və ona olan təhlükələrin dəf edilməsi, milli iqtisadiyata sərmayə cəlb edilməsi, neft sənayesini müasirləşdirilməsi üçün mühüm əhəmiyyət daşıyır. Amma, sazişdən Azərbaycan xalqının başqa gözləntiləri də var idi: "Gözlənilirdi ki, Azərbaycan dünyanın aparıcı ölkələrini təmsil edən transmilli şirkətlərlə əməkdaşlığa başlayandan sonra beynəlxalq aləmdə Qarabağ probleminə görə ölkəmizin ədalətli mövqeyini dəstəkləyənlərin sayı artacaq və torpaqlarımız tezliklə işğaldan azad olunacaq. Lakin, 25 il ötsə də bu gözlənti özünü doğrultmadı. Gözlənilirdi ki, Azərbaycan neftinin satışından əldə edilən qazanclar ədalətli bölüşdürüləcək, neft gəlirlərini insan kapitalına çevriləcək və hər bir Azərbaycan vətəndaşı ondan bəhrələnəcək. Lakin bu gəlirlər bir tərəfdən hakimiyyətin represiya maşının güclənməsinə, demokratiyaya keçidin əngəllənməsinə, digər tərəfdən də bir qrupun varlanmasına xidmət etdi".
Bəyanatda daha sonra deyilir: "Gözlənilirdi ki, Azərbaycan neftinin satışından əldə edilən gəlirlər işsizliyin azalmasına, yoxsulluğun aradan qaldırılmasına, milli iqtisadiyyatın şaxələnməsinə və modernləşməsinə sərf olunacaq. Lakin bu gözləntilər də baş vermədi, milli iqtisadiyyat hələ də texnoloji gerilikdən və diversifikasiyadan əziyyət çəkir.
Bütün qeyd olunanları nəzərə alaraq ADR Hərəkatı Azərbaycan hakimiyyətini "Əsrin müqaviləsi"nin 25 çi ildönümündə müqavilənin icrasının nəticələri ilə bağlı Xalqa hesabat verməyə çağırir, hakimiyyətdən neft gəlirlərinin səmərəsiz istifadəsinə və ədalətsiz bölgüsünə son qoymağı, neft pullarının xərclənməsində şəffaflığı artırmağı və korrupsiyanı aradan qaldırmağı tələb edir.
18.09.2019 17:52:00
Oxuma sayı: 209