Cavanşir Feyziyev ekoloji aksiyanın ərazidəki hərbi-siyasi vəziyyətlə bağlı yeni reallıqları üzə çıxardığını da bildirib. Onun fikrincə, aksiyanın davam etdiyi 26 gündə Qarabağda Azərbaycan hərbçilərinə və mülki şəxslərə qarşı silahlı təxribat halları demək olar ki, tam aradan qalxıb: "Buradan belə qənaətə gəlmək olar ki, dəhlizin bizim nəzarətimizdə olması həmin ərazidə yaşayan bütün insanların, o cümlədən həm azərbaycanlıların, həm də ermənilərin təhlükəsizliyi baxımından daha səmərəlidir. Odur ki, dəhlizin başlanğıcında, Laçın-Gorus sərhədində Azərbaycanın sərhəd-keçid məntəqəsinin və gömrük postunun qurulması ilə Qarabağın ermənilər yaşayan ərazisindən təşkil olunan silahlı təxribatların qarşısı tam alına bilər".

Deputat deyib ki, bu, post-münaqişə dövründə ərazidə formalaşmış mövcud duruma yeni baxışdır. Onun fikrincə, məsələnin belə qoyuluşu Ermənistanı növbəti dəfə dalana dirəmiş olur: "Əgər Ermənistan, öz rəhbərlərinin dediyi kimi, doğrudan da sülh gündəliyinə sadiqdirsə və ərazidə sülhün bərqərar olunmasında maraqlıdırsa, o zaman sərhəd bölgəsində sərhəd-keçid məntəqəsinin və gömrük postunun yerləşdirilməsinə razılıq verməlidir. Əks təqdirdə aydın olacaq ki, Ermənistan bizim torpaqlarımızda təxribatlar törətməyə və qeyri-qanuni hərbi qüvvələr tərəfindən terrorçuluq fəaliyyətini dəstəkləməyə davam etmək niyyətindədir".

Cavanşir Feyziyev hesab edir ki, mövcud vəziyyətin bu istiqamətdə inkişaf edəcəyi təqdirdə Azərbaycan öz ərazisində anti-terror əməliyyatı keçirməkdə haqlı olacaq.