Bakıda fəaliyyət göstərən 21 saylı Kəlbəcər məktəbində ibtidai sinif müəllimi Gültəkin Cəlilovanın rəhbəri olduğu IV sinifdə "Son dərs" tədbiri keçirilib.

Koordinat.az xəbər verir ki, tədbirdə məktəbin direktoru Şəmsi Nəbiyev, dərs hissə müdiri Nailə Ələsgərova, valideynlər iştirak edib. Bildirilib ki, bu il 21 saylı Kəlbəcər məktəbində IV sinifini 13 şagird bitirib.


Kəlbəcər rayonundan olan tanınmış ziyalı, vaxtilə həmin məktəbdə ibtidai sinif müəllimi işləmiş Sabir Mirzəyev də ibtidai təhsili başa vuran şagirdlərə müvəffəqiyyətlər arzulayıb. O, 1998-ci ilədək çalışdığı məktəbə 22 ildən sonra qonaq kimi qayıdışını xoş hadisə kimi dəyərləndirib: "İyirmi iki ildən sonra burada gördüklərim məndə xoş təəssürat yaratdı. Artıq Kəlbəcər məktəbləri 1990-cı illərdəki kimi hansısa yerli təhsil müəssisələrinin qoltuğunda deyil, indi məcburi köçkün soydaşlarımızın sıx məskunlaşdıqları yerlərdə kəlbəcərlilərin öz məktəbi var. Heç  şagirdlər də 22 il əvvəlki  uşaqlar deyil, onların hamısının üzü gülür, təhsil üçün yaradılan şəraitə görə fərəhlidirlər. O zamanlar müəllimlər arasında da ruh düşkünlüyü vardı, üzümüz gülmürdü, ailəni dolandırmaq çətin idi. Hətta əlamətdar günlərdə daha çox sıxıntı keçirərdik . Yerli məktəbin şagirdləri şənlik edəndə bizim uşaqlarımız, müəllimlər utanırdılar. Şükürlər olsun ki, indi məcburi köçkün rayonların məktəbliləri həm təchizata, həm də tədrisin keyfiyyətinə görə yerli məktəblərdən seçilmir, müəllimlərin və şagirdlərin də təhsillə bağlı çətinlikləri demək olar ki, yoxdur".

Sabir Mirzəyev 21 saylı Kəlbəcər məktəbi və onun pedaqoji kollektivi ilə bağlı acılı-şirinli xatirələrini danışıb, ibtidai təhsili başa vurub ilk məzun kimi tədrisin növbəti pilləsinə keçən şagirdlər tövsiyələrini verib, onlara xoş arzularını bildirib.