“Azərbaycan qadını yaradır” kitabının təqdimatından - FOTOLAR
Ölçü:


“Sönməz Məşəl” Mədəni Əlaqələr İctimai Birliyi Azərbaycan Dillər Universitetinin Amerika Mərkəzində UNESCO-nun maddi dəstəyi ilə həyata keçirdiyi “Qadınlar yaradır: Azərbaycanda gender bərabərliyi və qadınların uğurlarına dair  yaradıcı söhbətlər” layihəsinin yekunlarına həsr edilmiş təqdimat mərasimi keçirib.

Koordinat.az xəbər verir ki, layihə çərçivəsində ötən ilin yayında 40 nəfərə yaxın gənc azərbaycanlı qadın rəssam və yazar üçün seminarlar təşkil edilib. Seminarlar zamanı yaradıcı qadınlar Azərbaycan qadınının həyatına, uğurlarına, həyatda rastlaşdıqları problemlərə dair söhbətlər aparıb,  yaradıcılıq mübadiləsi əsasında yazıçılar rəsmlərə bədii əsərlər (kiçik hekayə, şeir və esse) həsr edib, rəssamlar isə yeni yazılan bədii nümunələrə rəsm çəkib.
 
Seminarlara Amerika Birləşmiş Ştatlarının Kaliforniya Dövlət Universitetinin müəllimi, şair və tərcüməçi Əlison Məndəvil və Azərbaycan Dillər Universitetinin dosenti və “Sönməz Məşəl” Mədəni Əlaqələr İctimai Birliyinin sədri Şəhla Nağıyeva rəhbərlik edib.
Rəssamlarla yazarların yaradıcı ünsiyyəti nəticəsində yaranan əsərlər toplu şəklində nəşrə hazırlanıb və bədii nümunələr ingilis dilinə tərcümə edilib.

Sonda “Azərbaycan qadını yaradır: Yazarlarla rəssamlar arasında ünsiyyət” adlı kitab-albomda rəsm əsərləri onlara yazılmış bədii nümunələr və onların ingilis dilinə tərcüməsi ilə birlikdə nəşr edilib.

“Qadınlar yaradır: Azərbaycanda gender bərabərliyi və qadınların uğurlarına dair  yaradıcı söhbətlər” layihəsinin yekunlarına həsr edilmiş mərasimdə həmin kitab təqdim edilib, yaradıcı seminarlar zamanı çəkilən rəsmlərdən ibarət sərgi təşkil olunub. Yazar qadınlardan bəziləri kitabda verilən bədii parçalardan nümunələr oxuyublar.
Təqdimat mərasimində Azərbaycan Dillər Universitetinin prorektoru vəzifəsini icra edən Sərraf Hüseynov, UNESCO üzrə Azərbaycan Respublikasının Milli Komissiyası Daimi Katibliyinin ikinci katibi Leyla Hacıyeva,  Azərbaycan Milli Elmlər Akademiyasının Fəlsəfə və Hüquq İnstitutunun baş elmi işçisi, Azərbaycan Milli Elmlər Akademiyasının müxbir üzvü  Könül Bünyadzadə çıxış edərək layihənin əhəmiyyəti barədə danışıblar. Yazıçılardan Svetlana Turan, Jalə İsmayıl, Rəbiqə Nazimqızı, Sevinc Çılğın, Nuranə Nur, Aysel Kərim və başqaları layihədə iştirakları barədə danışıb, bədii nümunələr oxuyublar.

Təqdimat mərasiminə ABŞ-dan telefonla qoşulan Əlison Məndəvil layihə iştirakçılarını salamlayıb, Azərbaycanın yaradıcı qadınları ilə işləməkdən həzz aldığını bildirib.
2004-cü ildə dövlət qeydiyyatına alınan “Sönməz Məşəl” Mədəni Əlaqələr İctimai Birliyi bundan əvvəl UNESCO-nun maliyyə dəstəyi ilə daha iki layihə həyata keçirib. Tərcümə ədəbiyyatına dair məlumatların toplandığı “Azərbaycan dilinin xəzinəsi” adlı sayt (http://www.translit.az/) yaradıb, Azərbaycan klassik qadın yazıçılarının poeziya antologiyasını Azərbaycan və ingilis dillərində  nəşr etdirib.

21.02.2018 10:56:00
Oxuma sayı: 13916