Türkiyə Rusiyadan "S-400" raketləri almaqda davam edəcək
Ölçü:

Rusiya ilə hərbi-texniki əməkdaşlıq, o cümlədən "S-400"lərlə bağlı iş birliyi Türkiyənin tələbatını ödəyir və buna görə də davam edəcək.

Koordinat.az xəbər verir ki, bunu Türkiyə prezidentinin baş müşaviri Mücahid Küçükyılmaz deyib. Onun sözlərinə görə, "S-400" kompleksləri ilə bağlı Türkiyənin mövqeyi hər zaman açıq olub: "Biz "S-400"lərlə bağlı nə düşünürüksə, ictimaiyyətə də elə onu deyirik. Mövzu ilə bağlı istər Qərb ölkələri olsun, istərsə Rusiya, həmsöhbətlərimizlə əlaqələrimizdə bildirdiyimiz təfərrüatlar qüvvədə qalır. Rusiya ilə hərbi-texniki əməkdaşlıq, o cümlədən "S-400"lərlə bağlı iş birliyi Türkiyənin tələbatını ödəyir və Qərb ölkələri ilə olduğu kimi, bu ölkə ilə də deyilən sahədə əməkdaşlıq davam etdiriləcək".

Rusiya və Türkiyə arasında 2017-ci ildə bir alay komplekti həcmində "S-400" zenit raket komplekslərinin satışı barədə müqavilə imzalanıb və 2019-cu ilin yay-payız aylarında həmin silahlar Türkiyəyə təhvil verilib. Bu sövdələşmə Türkiyə ilə ABŞ arasında münasibətlərdə böhrana səbəb olub. Aprelin sonunda Türkiyənin xarici işlər naziri Mövlud Çavuşoğlu Türkiyənin Rusiya ilə "S-400"lərin ikinci alayının alınması ilə əlaqədar danışıqlar apardığını bildirib.

ABŞ dövlət katibinin müavini Viktoriya Nuland iyul ayında konqresdə keçirilən dinləmələrdə bildirib ki, Türkiyənin Rusiyadan silah alınmasını davam etdirəcəyi təqdirdə, Birləşmiş Ştatlar Ankaraya qarşı mövcud sanksiyaları saxlayacaq və yenilərini də tətbiq edəcək.


29.07.2021 12:14:00
Oxuma sayı: 2027