Badamdar yolu açıldı
Ölçü:


Badamdar-20-ci sahə yolunda avtomobillərin hərəkəti tam bərpa olunub. Bir neçə ay əvvəl sürüşmə zonasında aparılan işlərə görə bağlanmış yolda əsaslı təmir işləri aparılıb, yola asfalt çəkilib.

Koordinat.az xəbər verir ki, bu barədə Bakı Şəhər Dövlət Yol Polisi İdarəsinin baş inspektoru, polis mayoru Araz Əsgərli APA-ya bildirib. O deyib ki, Badamdar-20-ci sahə yolu bütün növ avtomobllərin hərəkəti üçün yararlı hala gətirilib. Yaxın günlərdə marşrut avtobuslarının da yoldan istifadəsinə icazə veriləcəyi gözlənilir.

Qurum rəsmisi sürücülərə müraciət edərək onları yenidən istismara verilmiş yoldan istifadə etməyə çağırıb.

Qeyd edək ki, 2018-ci ildə Badamdar yamacında baş verən sürüşmədən sonra həmin ərazidən keçən yolda nəqliyyatın hərəkəti tamamilə dayandırılmışdı. 2021-ci ildə ərazidə yaşayan vətəndaşlarının rahatlığını təmin etmək məqsədilə yoldan yalnız minik avtomobillərinin hərəkətinə icazə verilib.

İki ay əvvəl isə yamacda görülən təmir işlərinə görə yol yenidən tamamilə bağlanmışdı.
24.01.2023 10:41:00
Oxuma sayı: 112