Şagirdin başqa sinfə keçirilməsi qalmaqal yaradıb - Bakıdakı 14 nömrəli məktəbdə
Ölçü:


Bir neçə gündür Bakıda yerləşən 14 nömrəli məktəbdə şagirdlərdən birinin səbəb olduğu problem sosial şəbəkələrdə ciddi şəkildə müzakirə olunur.

Koordinat.az xəbər verir ki, 3-cü sinifdə oxuyan şagirdlərdən birinin davranışlarında problem olduğu üçün başqa sinfə keçirilib. Amma yeni sinfin valideynləri buna etiraz ediblər. Etiraz o həddə çatıb ki, onlar uşaqlarını məktəbə göndərməkdən imtina ediblər. Bakı Şəhəri üzrə Təhsil İdarəsi məsələyə müdaxilə edib. Artıq hadisə ilə bağlı qərar qəbul olunub. "Xəzər" TV-nin yaydığı məlumata görə, Bakı Şəhəri üzrə Təhsil İdarəsinin nümayəndələri 14 nömrəli tam orta məktəbdə olub, 3-cü sinif şagirdlərinin valideynlərinin uşaqlarını dərsə buraxmamaları məsələsi ilə bağlı müzakirələr aparıblar.

Məlum olub ki, məktəbin rus bölməsinin 3-cü sinif şagirdi Məhəmmədhəsən Sadıqzadənin davranışı ilə bağlı problem yaranıb. Məktəb rəhbərliyi şagirdin sinfini dəyişərək onu 3-ç sinfinə keçirib. Lakin həmin sinfin valideynləri kütləvi olaraq şagirdin 3-ç sinfində oxumasına narazılıqlarını bildiriblər. Direktor valideynlərin tələblərini yerinə yetirmədiyindən onlar da uşaqlarını məktəbə göndərmirlər. Artıq 3 gündür ki, Məhəmmədhəsən Sadıqzadə dərslərdə tək iştirak edir. Valideynlər bu uşağın davranışından qorxduqlarını və şagirdlərə xəsarət yetirə biləcəyindən ehtiyat etdiklərini deyirlər.

Məktəbin direktoru Hürzad Verdizadə Məhəmmədhəsənin yeni sinfində psixoloq nəzarəti altında dərsə girəcəyini desə də, valideynlər bununla da razılaşmırlar.

Bakı Şəhəri üzrə Təhsil İdarəsi bir neçə saat ərzində Məhəmmədhəsən Sadıqzadə ilə söhbət edib və valideynlərin şikayətlərini dinləyiblər. Məlum olub ki, uşaqda heç bir davranış pozuntusu yoxdur. Bu hadisə ərköyün böyüyən Məhəmmədhəsənin psixologiyasına pis təsir edir. Bakı Şəhəri üzrə Təhsil İdarəsinin nümayəndəsi Elşad Səfərovun sözlərinə görə, yoldaşları ilə yola gedə bilməyən şagirdin sinifdən-sinfə köçürülməsi istifadə olunan təcrübədir. Hazırda Məhəmmədhəsən Sadıqzadə 3ç sinfində təhsilini davam etdirir.

Bakı Şəhəri üzrə Təhsil İdarəsi valideynlərə övladlarını dərsə göndərmələrini tövsiyə edir.
30.11.2017 11:00:46
Oxuma sayı: 133