Qobustanda şagird şagirdi bıçaqlayıb
Ölçü:



Qobustan rayon A.O.Çernyayevski adına şəhər 1 saylı tam orta məktəbin şagirdləri arasında bıçaqlanma hadisəsinin olması barədə məlumat yayılıb.

Koordinat.az xəbər verir ki, məktəb yoldaşını bıçaqlamaqda şübhəli bilinən 11-ci sinif şagirdi  Rauf Ağaquliyevlə məktəbin yaxınlığında 10-cu sinif şagirdi Vüsal Təbiət oğlu Şəhriyarov arasında mübahisə yaranıb. Mübahisə zəminində R.Ağaquliyev üstündə saxladığı bıçaqla V.Şəhriyarova 4 bıçaq zərbəsi vuraraq hadisə yerindən qaçıb. O, polis əməkdaşları tərəfindən axtarılır.

Qeyd olunub ki, yaralı Qobustan Rayon Mərkəzi Xəstəxanasına yerləşdirilib. Onun  vəziyyətinin ağır olduğu bildirilir.

Modern.az saytı məsələnin aktuallğını nəzərə alaraq məktəbin direktoru İmran Sabitovla  əlaqə saxlayıb.  O, saytımıza açıqlamasında heç bir bıçaqlanma hadisəsinin olmadığını deyib.

“Son zəng” tədbirini bu dəqiqə yekunlaşdırdıq. Səhər saat 8-dən məktəbdəyəm. Məktəbdə elə bir hadisə baş verməyib. Görünür, kimsə yanlış məlumat yayıb. Adı keçən Rauf Ağaquliyev  11-ci sinfi bitirir. Üzərində məzun lenti var. Hazırda şagirdlərlə şəkil çəkdirir. Belə bir hadisə olsa biz də bilərik. Rauf uşaqların arasındadır”.

Qobustan rayon təhsil şöbəsinin müdiri Füzulıi Gülalıyev də A.O.Çernyayevski adına şəhər 1 saylı tam orta məktəbin şagirdləri arasında baş verən bıçaqlanma ilə bağlı açıqlama verib.

F.Gülalıyev "Report"a bildirib ki, məktəbin 10-cu sinif şagirdi V.Şəhriyarovu bıçaqlayan şəxs artıq polis əməkdaşları tərəfindən saxlanılıb: "Hadisə səhər saat 8 radələrində məktəbdən kənarda baş verib. Məktəbin 11-ci sinif şagirdi Rauf Ağaquliyev "Son zəng" tədbirində iştirak etmək üçün səhər məktəbə gələrəkən Vüsal Şəhriyarovla yolda aralarında mübahisə yaranıb. Nəticədə Rauf Vüsala bir neçə bıçaq zərbəsi vurub. Vüsalın vəziyyəti hazırda normaldır. Rauf isə polis əməkdaşları tərəfindən saxlanılıb".

14.06.2018 13:12:00
Oxuma sayı: 290