Zərdabda bəy və gəlini toya buraxmadılar - RƏSMİ REAKSİYA
Ölçü:


50 nəfərdən 150 nəfərə qədər vətəndaşın iştirakı ilə təşkil olunan toy məclislərində bəy və gəlin də daxil olmaqla yaşı 18-dən yuxarı olan bütün şəxslər tam vaksinasiyadan keçməlidir.

Koordinat.az xəbər verir ki, bunu Daxili İşlər Nazirliyinin Mətbuat xidmətinin şöbə rəisi Elşad Hacıyev Lent.az-a bildirib. O qeyd edib ki, bəy və gəlinin də toy mərasimində iştirakına “COVID”ə qarşı peyvənd olunmalarına və ya koronavirusdan sağalmalarına dair sənəd təqdim etdikləri halda icazə verilir: "Bununla bağlı Nazirlər Kabineti yanında Operativ Qərargahın müvafiq qərarı var. Qərarda hansısa formada iştirakçılar arasında istisna nəzərdə tutulmayıb. Hər bir şəxs bu qayda və tələblərə əməl etməli, özünü və digər şəxsləri infeksiya riskindən qorumaq üçün üzərinə düşən vəzifəni həyata keçirməlidir”.  

Qeyd edək ki, ötən gün Zərdabda bəy və gəlin toya buraxılmayıb. Rayonun Qoruqbağı kəndində yerləşən şadlıq sarayında təşkil olunan toy məclisinə gələn qonaqların "COVID" pasportları yoxlanılarkən məlum olub ki, bəy Səmədov İsaq Cabir oğlu və gəlin Qurbanova Səbinə Əlvan qızı peyvənd olunmayıblar. Yeni ailə quran cütlüyə pandemiya qaydalar izah edilib və onlara peyvəndləmə ilə bağlı təklif verilib. Bəy-gəlin təklifi könüllü qəbul edib və kəndin tibb məntəqəsinə gedərək peyvənd olunublar. Daha sonra onlar şadlıq evinə qayıdaraq toy məclisinə qoşulublar.

29.07.2021 13:15:00
Oxuma sayı: 160