Azərbaycanlıların Xankəndiyə köçürülməsi niyə ləngiyir? - təhlükəsizlik, hazırlıqsızlıq, yoxsa...
Ölçü:

Ötən ilin 10 noyabrından etibarən Rusiya sülhməramlılarının iştirakı ilə çoxlu erməni ailəsi Qarabağa köçürülüb. İşğala qədər Qarabağda yaşayan azərbaycanlıların isə Rusiya sülhməramlılarının nəzarət etdiyi ərazilərə köçürülməsi ləngiyir.

Koordinat.az
xəbər verir ki, politoloq İlqar Vəlizadə azərbaycanlıların köçürülməməsinin texniki səbəblərlə əlaqələndirib: "Bu illər ərzində ermənilər azərbaycanlıların yaşadığı evləri zəbt edərək, orada yaşayırlar. İndi guya həmin evlər onların adınadır. Azərbaycanlıların qayıtması üçün bu ünvanları dəqiqləşdirməli, sənəd tərtib etməliyik. Soydaşlarımız bu ünvanlara mütləq qayıdacaq. Heç kəsin buna şübhəsi olmasın”.

Politoloq burada təhlükəsizliklə bağlı məqamların da olduğunu bildirib: "Proses təhlükəsizlik şəraitində baş verməli və ardıcıllıq, planlı şəkildə həyata keçməlidir.  Təəssüf ki, regionda hələ də separatçı qüvvələr fəaliyyət göstərir. İlk növbədə onlar zərərsizləşdirilməlidir. Nə qədər ki, Araik Arutunyan, Babayan və digərləri orada fəaliyyət göstərir, azərbaycanlıların həmin ərazilərimizə qayıtması bir qədər təhlükəli olacaq.  Bu prosesin təmin edilməsində isə sülhməramlılar da iştirak etməlidir”.

İlqar Vəlizadə bu məsələnin həllində Türkiyə hərbçilərinin də yer aldığı Monitorinq Mərkəzinə ümid edir: "Türkiyə sülhməramlılarının gəlişi ilə Monitorinq Mərkəzi fəaliyyətə başlayacaq.  Monitorinq Mərkəzinin fəaliyyət istiqamətlərindən biri də məhz azərbaycanlı məcburi köçkünlərin öz doğma el-obalarına qayıdışının təmininatı və separatçı qurumların ləğv edilməsidir” (Sfera.az).
25.01.2021 18:47:00
Oxuma sayı: 30