“İşləməyən minlərlə insan nə ilə dolanmalıdır?” - Milli Məclisdə hökumətə çağırış
Ölçü:


“Bu gün pandemiyanın yaratdığı vəziyyət çevik qərarlar verilməsini şərtləndirir”.

Koordinat.az xəbər verir ki, bunu Milli Məclisin iclasında “Azərbaycan Respublikasının 2020-ci il dövlət büdcəsi haqqında” Qanununda dəyişiklik edilməsi barədə Azərbaycan Respublikası qanunu”nun layihəsinin müzakirəsi zamanı deputat Fazil Mustafa deyib.
Onun sözlərinə görə, büdcədə zəruri prioritet sahələri dəqiqləşdirilməli, müdafiə xərclərinin artırılması yönündə addımlar atılmalı, ikinci istiqamət üzrə vətəndaşın vəziyyəti prioritet kimi götürülməlidir: "Bu gün Azərbaycan vətəndaşının, sahibkarının vəziyyəti çətindir. Burada hökuməti günahlandırmıram. Azərbaycan sahibkarının tam çökməməsi üçün xərclər hissəsində əhəmiyyətli ayırmalar nəzərdə tutulmalıdır. İkincisi, vətəndaşlara 190 manatın verilməsi məsələsi zəruri addım idi. Vəsait o qədər çox olmasa da, cəmiyyət bunu anlayışla qarşıladı. Avqust ayında heç bir yerdən gəliri olmayan vətəndaşı evə qapatmışıq və onlara vəd vermirik ki, haradan dolanmalıdır. Bu gün insanlar sadəcə xəstəliklə mübarizə aparmır, yaşamaq uğrunda da mübarizə aparır. 190 manat rəmzi xarakter daşıyan dövlət dəstəyidir və bunu heç bir halda kəsmək olmaz. Vətəndaşın narazılığına səbəb olan situasiyanı aradan qaldırmalıyıq. Buna görə də xərclər hissəsində bu, əsas götürməlidir. Ayın 31-nə qədər hər yer bağlıdır. İşləməyən yüzlərlə, minlərlə insan nə ilə dolanmalıdır? Hökumət bütün səyləri sosial gərginliyin aradan qaldırılmasına yönəltməlidir”.

05.08.2020 12:20:00
Oxuma sayı: 54