Nazir müavini: "Qəbul imtahanlarında test sistemi ləğv olunmayacaq"
Ölçü:


"Azərbaycanda test sisteminin ləğvindən söhbət getmir. Qiymətləndirmənin formatında yeniliklərin tətbiqi nəzərdə tutulur, amma formatda müəyyən yeniliklər olsa belə, sistemdə ciddi dəyişikliklər baş verməyəcək".

Koordinat.az
xəbər verir ki, bunu təhsil nazirinin müavini Ceyhun Bayramov test imtahanının ləğv ediləcəyi barədə yayılan məlumatlara münasibət bildirərkən deyib.
Kurrikulumla təhsil alanlar üçün 2 ildən sonra qəbul imtahanlarında dəyişikliklərin ediləcəyini deyən nazir müavinin sözlərinə görə, artıq qiymətləndirmə metodikasında yeniliklərə start verilib.

C.Bayramov deyib ki, bu il 9-cu sinifdə təhsil alan şagirdlər artıq yeni format üzrə imtahan veriblər. O, bir daha qeyd edib ki, yeni dəyişikliklər test sisteminin ləğvi demək deyil: "Söhbət ondan gedir ki, kurrikulum proqramı ilə təhsil alan şagirdlərin biliklərinin yalnız bizim qəbul etdiyimiz ənənəvi qaydada, bir neçə seçim əsasında olan test vasitəsilə həyata keçirilməsi mümkün deyil. Ona görə də orada daha geniş qiymətləndirmənin aparılmasından söhbət gedir. Bu, artıq 9-cu sinif səviyyəsində baş verdi. Yenə də qeyd edirəm ki, qiymətləndirmənin formatında yeniliklərin tətbiqi nəzərdə tutulur. Bu istiqamətdə də Təhsil Nazirliyi ilə Dövlət İmtahan Mərkəzi arasında işlər davam etdirilir. Yaxın vaxtlarda bununla bağlı geniş məlumat veriləcək. Biz bir məqamı əminliklə qeyd edə bilərik ki, formatda müəyyən dəyişikliklər olsa da belə, sistemdə ciddi dəyişikliklər baş verməyəcək. Yəni burada obyektiv qiymətləndirmə olduğu kimi həyata keçiriləcək, hərtərəfli qiymətləndirmə əsasında şagirdlərin biliyinin üzə çıxarılması həyata keçiriləcək".

13.09.2017 21:16:00
Oxuma sayı: 142