Prezidentin sabiq köməkçisinə  yeni vəzifə verilib
Ölçü:


Sentyabrın 12-də Azərbaycan Respublikası Müharibə, Əmək və Silahlı Qüvvələr Veteranlar Təşkilatının Rəyasət Heyətinin iclası keçirilib.

Koordinat.az
xəbər veriur ki, iclasda Respublika Veteranlar Təşkilatının sədri general-mayor Dadaş Rzayevin səhhətində problemlər yarandığı və bunun nəticəsində təşkilatın gündəlik fəaliyyətində bəzi məsələləri daha operativ həll etmək baxımından çətinliklərin ortaya çıxdığı qeyd olunub. Respublika Veteranlar Təşkilatının ictimaiyyətlə əlaqələr şöbəsinin bununla əlaqdar yaydığı açıqlamada deyilir ki, təşkilatın ümumi fəaliyyətinin gücləndirilməsi zərurəti nəzərə alınaraq, istefada olan general-mayor Dadaş Rzayevin müalicəsinin davam etdirilməsi və Respublika Veteranlar Təşkilatının sədri vəzifəsindən azad olunması məqsədəuyğun hesab edilib. Respublika Veteranlar Təşkilatının Rəyasət Heyətinin üzvləri tərəfindən qurumun sədri vəzifəsinin icrasının istefada olan general-polkovnik Tofiq Ağahüseynova həvalə edilməsi təklif edilib.

Hər iki təklif səsə qoyularaq yekdilliklə qərar qəbul olunub.

Xatırladaq ki, Dadaş Rzayev 1935-ci ildə Goranboy rayonunun Dəliməmmədli qəsəbəsində anadan olub. 1959-cu ildə SSRİ Hərbi Hava Desantçıları Məktəbini, 1973-cü ildə M.F.Frunze adına Ali Hərbi Akademiyanı bitirib, SSRİ-nin müxtəlif hərbi hissələrində xidmət edib. Sovet ordusunda hərbi xidmətini əlahiddə qırıcı hərbi-hava desantçıları briqadasının komandiri kimi başa vurub. 1990-cı illərin əvvəllərində vətənə dönüb, 1991-ci ilə qədər Qarabağa Xalq Yardımı Komitəsində işləyib. 1991-ci ilin sentyabrında milli özünümüdafiə qüvvələrinin komandanı – Azərbaycan Respublikası müdafiə nazirinin birinci müavini təyin edilib. Həmin ilin dekabrında polkovnik Dadaş Rzayev general-mayor hərbi rütbəsinə layiq görülüb.

1993-cü il fevralın 21-dən 1993-cü il iyunun 17-dək Azərbaycanın müdafiə naziri olub.
Əfqanıstan və Qarabağ müharibələrinin veteranı olan Dadaş Rzayev Respublika Veteranlar Təşkilatına 2014-cü il yanvarın 28-dən sədrlik edirdi.

Tofiq Yaqub oğlu Ağahüseynov isə 1923-cü il fevral ayının 1-də Şəkidə anadan olub. O SSRİ Silahlı Qüvvələrində general-polkovnik rütbəsi alan ilk azərbaycanlıdır. Azərbaycan Prezidenti Heydər Əliyevin 1997-ci il 17 aprel tarixli sərəncamı ilə Tofiq Ağahüseynov prezidentin hərbi məsələlər üzrə köməkçisi təyin olunub.

Azərbaycan Respublikasının Prezidenti İlham Əliyevin 1 fevral 2008-ci il tarixli Sərəncamı ilə Azərbaycanda hərbi qulluqçuluq sahəsində xidmətlərinə görə “Şöhrət” ordeni ilə, 17 yanvar 2013-cü il tarixli Sərəncamı ilə Azərbaycan Respublikası Silahlı Qüvvələrinin formalaşdırılmasında və hərbçi kadrların hazırlanmasında xüsusi xidmətlərinə görə “Azərbaycan Bayrağı” ordeni ilə təltif olunub.
13.09.2017 13:19:00
Oxuma sayı: 158