Afaq Bəşirqızı 36 yaşlı yeni icra başçısını qınadı: "Ay uşaq, 1992-ci ildə sənin..."
Ölçü:


Xalq artisti Afaq Bəşirqızı yeni təyin olunan Ağstafa rayonun yeni icra başçısını tənqid edib.

Koordinat.az xəbər verir ki, xalq artisti yenicə icra başçısı təyin olunmuş Seymur Orucovu yaşının imkan vermədiyi məsələlərdən danışdığına görə qınayıb:  “Ağstafa kimi ziyalılar məskəninə - Ağstafa, Qazax, Tovuz istər elm, istər mədəniyyət sahəsində öndə gedən rayonlarımızdır, çox güclü mütəxəssislər yetişdirən diyardır - 1984-cü il təvəllüdlü bir uşağın təyin olunması və təyinatından az sonra o cür danışması yolverilməzdir. Ay uşaq, 1992-ci ildə sənin səkkiz yaşın var idi. Gərək sənə vəzifə təklif olunanda özün deyəydin ki, mən buna layiq deyiləm. Bəsdirin! Son qoyun qohumbazlığa. Bu, filankəsin qızıdır, bu, filankəsin oğludur".

Afaq Bəşirqızı Azərbaycan xalqının artıq uçurumun kənarında olduğunu deyib və bildirib ki, bütün bunların baiskarı korrupsiyalaşmış, xalqın malını oğurlayan məmurlardır: "Uçurumun kənarındayıq. Əlbəttə, siz bunu hiss edə bilməzsiniz. Niyə? Çünki sizin artıq dəniz qıraqlarında, çay qıraqlarında, meşələrdə, ormanlarda Azərbaycandan oğurladığınız pullarla gözəl villalarınız, şəraitiniz var. Uçurumun kənarında xalqdır, siz yox".

Xatırladaq ki, dünən İlham Əliyev Seymur Orucovu Ağstafa rayon icra hakimiyyətinin başçısı vəzifəsinə təyin olunması ilə əlaqədar videoformatda qəbul edib. Qəbul zamanı Seymur Orucov bunları deyib: “1990-cı illərin əvvəllərində hakimiyyəti zəbt etmiş AXC-Müsavat dövründə Azərbaycan gəncliyini zorla ali təhsil ocaqlarından, iş yerlərindən mitinq bölgələrinə və onların yarıtmaz liderlərinə dəstək tədbirlərinə aparırdılar. Gənclərimiz çox bədbin ruhda idilər”.
22.05.2020 20:24:00
Oxuma sayı: 80