"Azərbaycan Dəmir Yolları” Çin şirkəti ilə protokol imzalayıb - FOTO
Ölçü:


“Azərbaycan Dəmir Yolları” Qapalı Səhmdar Cəmiyyətində Çinin Ningxia Kommersiya Departamentinin baş direktor müavini, Ningxia Liman Ofisinin direktoru cənab Kong Guohuanın rəhbərlik etdiyi nümayəndə heyəti ilə görüş keçirilib.

Səhmdar Cəmiyyətdən Koordinat.az-a verilən məlumata görə, “Azərbaycan Dəmir Yolları” QSC-nin sədri Cavid Qurbanov çıxış edərək, Azərbaycanın nəqliyyat-logistika imkanları, Beynəlxalq Transxəzər Nəqliyyat Marşrutu, o cümlədən inşası bu il başa çatacaq Bakı-Tbilisi-Qars dəmir yolu bağlantısı, “Şimal-Cənub” və “Cənub-Qərb” nəqliyyat dəhlizi layihələrindən danışıb. O bildirib ki, Azərbaycan tərəfi Çinin “Bir kəmər-bir yol” strategiyasının iki istiqamətindən biri olan və Qədim İpək Yolu üzərində yerləşən ölkələr arasında iqtisadi sahədə münasibətlərin daha da genişləndirilməsini nəzərdə tutan “İpək Yolu İqtisadi Kəməri” təşəbbüsünün reallaşmasına böyük töhfələr verə bilər. Azərbaycan ərazisindən keçən marşrutlar daha çox iqtisadi potensiala malikdir. Sonra “Beynəlxalq yükdaşımalarının səmərəliliyinin artırılması və təşkili” məsələsi müzakirə olunub.

Çinin Ningxia Kommersiya Departamentinin baş direktor müavini Kong Guohua çıxış edərək Azərbaycanın nəqliyyat-logistika imkanlarından istifadə etməkdə maraqlı olduqlarını bildirib.

Görüş zamanı Ələtin coğrafi cəhətdən əlverişli mövqedə yerləşdiyi nəzərə alınaraq buranın Azərbaycan ərazisindən keçərək Çindən Avropaya, İrana və Rusiyaya eləcə də əks istiqamətdə dövr edən yüklərin daşınmasında mərkəz kimi istifadə olunması istiqamətində gələcək perspektivlər müzakirə olunub. Tədbirin sonunda “Azərbaycan Dəmir Yolları” Qapalı Səhmdar Cəmiyyəti ilə Çinin Ningxia Kommersiya Departamenti arasında gələcək əməkdaşlıq haqqında protokol imzalanıb.
19.06.2017 16:43:15
Oxuma sayı: 628