Kütləvi şəkildə zəhərlənən uşaqlardan bəziləri yenidən xəstəxanaya qaytarılıb
Ölçü:


“Sumqayıtda zəhərlənmə diaqnozu ilə xəstəxanaya yerləşdirilən uşaqlardan 50 nəfər müalicəsini davam etdirir”.

Koordinat.az
xəbər verir ki, bunu Səhiyyə Nazirliyinin mətbuat xidmətinin rəhbəri Liya Bayramova məlumat verib. Sumqayıt şəhər Səhiyyə şöbəsinin müdiri Nəriman Baxşəliyev isə bildirib ki, uşaqlarda işləmə və qusma mövsümlə əlaqəlidir: “Havaların isti olması ilə bir çox infeksiyalar aktivləşir. Bəzi meyvələrin, tut və gilasın daha çox yeyilməsi, xüsusilə yuyulmadan yeyilməsi, soyuq sudan istifadə edilməsi bu infeksiyaların aktivləşməsinə səbəb olur. Əksər uşaqlar tut, gilas yeyib, üstündən soyuq su içdiklərini deyir. Günün qabağında çox qalanlar da var. Bu da öz təsirini göstərir. Virus mənşəli infeksiyalar mövsümü xarakter daşıyır. Burada kütləvilikdən danışmaq olmaz. Bəzi insanlar bunu düzgün başa düşmürlər”.

N.Baxşəliyev qeyd edib ki, iyunun 7-dən bu günə qədər xəstəxanaya ümumilikdə 186 nəfər müraciət edib: “Onların hamısı işləmə və qusma ilə gəlməyib. İçərisində angenoz, qribos xəstəlikləri ilə də müraciət edənlər də var. Epidemik göstərici normaldır, qorxulu bir şey yoxdur. Onların həyatı üçün heç bir təhlükə yoxdur”.

Səhiyyə Nazirliyi Gigiyena və Epidemiologiya Mərkəzinin direktoru vəzifəsini icra edən İmran Abdullayev Modern.az-a bildirib ki, evə yazılan uşaqlardan bəziləri yenidən xəstəxanaya qayıdıb, həmçinin yeni müraciət edənlər də var: “Ona görə də xəstəxanda olan uşaqların sayı tez-tez dəyişir”.

Mərkəz rəsmisi deyib ki, sudan götürülən analizlərin nəticəsinin bu gün axşam açıqlanacağı gözlənilir: “Nəcis və qusuntu materiallarından götürlən analizlərin cavabı isə yəqin ki sabaha bəlli olacaq”.

Qeyd edək ki, iyunun 10-da H.Z.Tağıyev və Ceyranbatan qəsəbəsində yaşayan 130-a yaxın uşaq zəhərlənmə diaqnozu ilə Sumqayıt şəhər 1 saylı Uşaq Xəstəxanasına yerləşdirilib. İlkin ehtimal kimi onların sudan zəhərləndiyi bildirilib.

“Azərsu” ASC rəsmi açıqlama yayaraq, uşaqlar arasında kütləvi zəhərlənmənin sudan olmadığını bəyan edib (Modern.az)..

12.06.2017 10:07:00
Oxuma sayı: 392