Əməkdar jurnalist Adil Cəmilin 65 illik yubileyi qeyd olundu - FOTOLAR
Ölçü:


Əməkdar jurnalist, filologiya üzrə fəlsəfə doktoru, şair, tədqiqatçı Adil Cəmilin 65 illik yubileyinə həsr olunan tədbir keçirilib.

Koordinat.az
xəbər verir ki, Mətbuat Şurası və "Aşıq Şəmşir" Mədəniyyət Ocağı İctimai Birliyinin birgə təşkilatçılığı ilə keçirilən tədbirdə yubilyarın həyat və yaradıcılığından danışılıb. Mətbuat Şurasının sədri, deputat Əflatun Amaşov bildirib: "Adil Cəmil bütün titulları ilə yanaşı, iliyinə qədər şairdir. Mənə elə gəlir ki, Kəlbəcərdə doğulub şair olmamaq günah olar. Adil Cəmil həm də bir çox filmlərin tərcüməçisidir".

Əflatun Amaşov yubilyarı Mətbuat Şurasının diplomu ilə təltif edib.

Xalq şairi Sabir Rüstəmxanlı isə Adil Cəmili 1978-ci ildən tanıdığını bildirib. O qeyd edib ki, ilk tanışlıq Adil Cəmilin işlə bağlı redaksiyaya gəlişindən sonra baş tutub: "Biz onunla birlikdə işləmişik. Mən bu müddət ərzində Adil Cəmilin yüksək əxlaqı keyfiyyətləri ilə seçilən bir insan olduğunun şahidi oldum. Çox savadlı jurnalist dostumuzdur. Mən ona cavan dostum kimi baxıram. Onu mənə sevdirən həm də yaradıcılığıdır. Adilin şeirləri sevgi, təbiətə bağlılıq, yurd, Vətən sevgisi üzərində qurulub. Adil bütün bunlardan əlavə doğuluşdan şairdir".

Tədbirdə Adil Cəmilin təhsil aldığı Bakı Dövlət Universitetinin (BDU) Jurnalistika fakültəsinin müəllimi Nəsir Əhmədli çıxış edib. O, yubilyarın tələbəlik illərindən söz açaraq bildirib ki, BDU-da ilk dəfə müəllim kimi məhz Adil Cəmilin də olduğu tələbələrin kursunda mühazirə oxuyub. Nəsir Əhmədli tələbələrinin yubiley mərasimlərində iştirak etməyin müəllim üçün ən böyük xoşbəxtlik olduğunu vurğulayıb.

Tədbirdə çıxış edən "Aşıq Şəmşir" Mədəniyyət Ocağı İctimai Birliyinin sədr müavini Həbib Misirov çıxışında birliyin sədri Qənbər Qurbanovun salamlarını çatdırıb. O, yubiley mərasiminin keçirilməsində təşkilatçılıq etdiyi üçün Mətbuat Şurasına təşəkkürünü bildirib. Həbib Misirov qeyd edib ki, Adil Cəmil istedadlı şair olduğu qədər həm də istedadlı jurnalistdir: "Onun bütün yaradıcılığı yüksək istedadla ərsəyə gəlib. Təbii ki, işğal altında olan Kəlbəcərin yanğısı səbəbilə Adil Cəmilin külliyyatında Vətən həsrəti önə çəkilə bilər. Amma, ümumilikdə, onun bütün yaradıcılığı sevgi üzərində qurulub".

Həbib Misirov çıxışının sonunda "Aşıq Şəmşir" Mədəniyyət Ocağı İctimai Birliyinin fəxri diplomuni yubilyara təqdim edib və ona bundan sonrakı fəaliyyətində uğurlar arzulayıb.

Daha sonra "Azərnəşr"in baş redaktoru, əməkdar jurnalist Əlövsət Ağalarov, qocaman şair Ramiz Məmmədov və digərləri çıxış edərək yubilyarın həyat və yaradıcılığı haqqında söz açıblar.
20.10.2019 10:22:00
Oxuma sayı: 47