Bu ilin əvvəlindən avqust ayının 1-nə kimi Azərbaycan Respublikası üzrə əhalinin sayı 46417 nəfər və ya 0,5 faiz artaraq 10027874 nəfərə çatıb.

Dövlət Statistika Komitəsindən Koordinat.az-a verilən məlumata görə, əhalinin 52,8 faizini şəhər, 47,2 faizini kənd sakinləri, 49,9 faizini kişilər, 50,1 faizini isə qadınlar təşkil edir. Hər kvadrat kilometrə düşən əhali sayı 116 nəfər olub.
Bu ilin yanvar-iyul aylarında Ədliyyə Nazirliyinin rayon (şəhər) qeydiyyat şöbələri tərəfindən 35192 nikah və 9793 boşanma halları qeydə alınıb. Ötən ilin müvafiq dövrü ilə müqayisədə əhalinin hər 1000 nəfərinə nikahların sayı 5,8-dən 6,1-ə, boşanmaların sayı isə 1,5-dən 1,7-yə qədər artıb.

Bu ilin 7 ayı ərzində ölkədə 33647 ölüm halı qeydə alınıb. Ötən ilin müvafiq dövrü ilə müqayisədə əhalinin hər 1000 nəfərinə ölüm səviyyəsi 6,1-dən 5,8-ə düşüb. Cari ilin yanvar-iyul ayları ərzində Daxili İşlər Nazirliyi (DİN) və Dövlət Miqrasiya Xidmətinin (DMX) müvafiq qurumları tərəfindən daimi yaşamaq üçün Azərbaycana 1095 nəfər gələn, Azərbaycandan isə 892 nəfər gedən qeydə alınıb.

Miqrasiya saldosu müsbət 203 nəfər təşkil edib.