Nazir vətəndaşlara paylanan arıq inəklərdən danışdı: "Saxtakarlığa yol verilib"
Koordinat.az xəbər verir ki, bunu Modern.az-a açıqlamasında Əmək və əhalinin sosial müdafiəsi naziri Sahil Babayev deyib. Nazir bildirib ki, mal-qara məsələsində saxtakarlığa yol verilib: “Siz indi saxtakarlığın dərəcəsinə baxın. Həmişə deyirəm ki, niyə 2017-ci ildə heyvanlar veriləndə kimsə danışmırdı?! 2018- ci ildə hamı eşitdi, bildi. 30 min heyvan verildi. Ancaq kiçik bir faizini şişirtdilər. İndi isə ikinci tendensiya başlayıb. Gəlib deyirlər ki, verilən heyvan xəstədir. Noyabr ayında biz heyvanı verəndə onun baytar arayışı, heyvanın şəkli var idi. Qida Təhlükəsizliyi Agentliyindən xahiş etdik, məsələ ilə yerində tanış oldular. 146 heyvanda xəstəlik aşkar olundu. İstənilən fermer heyvan götürüb 6 ay saxlayandan sonra həmin heyvanlaın içərisində xəstələnəni də olacaq. Vətəndaş gəlib deyir ki, inək öskürür. Deyirəm ki, “ay ağsaqqal, bu heyvanları harada saxlayırsan?”. Cavab verir ki, “həyətdə saxlayıram”. Təbii, həyətdə saxlayanda xəstələnəcək. Həmçinin, demək istəmirəm ki, gələn vətəndaş yalan deyir. Ola bilər ki, düz deyir. Ola bilər ki, bizimkilərin səhvi olub. 25 əməkdaşımla bağlı prokurorluğa özüm təqdimat vermişəm. Cinayət işi açılıb. Bunu özüm açıqlamamışam. Bunu açıqlamaq mənə nə verəcək ki?”.
Nazir bildirib ki, 9 milyon manat vəsaitin əməkdaşlarının hesabına dövlət büdcəsinə köçürülməsini təmin edib: “Bu iş davam edəcək. Səhv tapanda cəzalandıracağıq”.
25.06.2019 10:29:00
Oxuma sayı: 196