Əli Həsənov iradlarını britaniyalı səfirə bildirdi - üzbəüz görüş
Ölçü:


Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri, Beynəlxalq Humanitar Yardım üzrə Respublika Komissiyasının sədri Əli Həsənov Böyük Britaniya və Şimali İrlandiya Birləşmiş Krallığının  ölkəmizdəki fövqəladə və səlahiyyətli səfiri xanım Kerol Meri Kroftsla görüşüb.

Koordinat.az xəbər verir ki, görüşdə Azərbaycan ilə Böyük Britaniya arasındakı əlaqələrdən, qarşılıqlı maraq doğuran məsələlərdən bəhs olunub. Səfir Kerol Meri Krofts deyib ki, ölkəsi Azərbaycanla 20 ildən artıqdır uğurlu əməkdaşlıq edir. O, BP-nin Azərbaycanda ən böyük sərmayə yatıran şirkət olduğunu da xatırladıb.

Səfir Azərbaycanda olduğu müddətdə respublikamızın müxtəlif bölgələri ilə də tanış olduğunu, son illər Azərbaycanın sürətli inkişaf etdiyini vurğulayıb.

Əli Həsənov iki ölkə arasında əlaqələri daha da inkişaf etdirməyin, qarşlıqlı əməkdaşlğın  möhkəmləndirilməsinin vacibliyini qeyd edib. O, Böyük Britaniyadan olan 150-yə yaxın şirkətin qeyri neft sektorunda, o cümlədən neft sektorunda BP-nin fəaliyyət göstərdiyini, Ermənistan-Azərbaycan, Dağlıq Qarabağ münaqişəsi ilə bağlı Böyük Britaniyanın beynəlxalq təşkilatlarda ölkəmizin haqlı mövqeyini dəstəklədiyini yüksək qiymətləndirib.

Baş nazirin müavini eyni zamanda Böyük Britaniya vətəndaşları və şirkətlərinin Azərbaycanın işğal olunmuş ərazilərinə qeyri-qanuni səfərləri və fəaliyyətinin,  ölkəmizin işğal edilmiş ərazilərindəki filiz mədənindən qanunsuz çıxarılmış qızıl Ermənistanda emal olunaraq bir çox Avropa ölkələrində, o cümlədən London Fond Birjasında satışa çıxarılmasının yol verilməz olduğunu da səfirin diqqətinə çatdırıb: "Bu cür xoşagəlməz halların qarşısı alınmalıdır".
  
Ermənistan-Azərbaycan, Dağlıq Qarabağ münaqişəsi, onun yaranma tarixi barədə ətraflı məlumat verən Əli Həsənov bildirib ki, Azərbaycanın işğal olunmuş ərazilərinin azad edilməsi, qaçqınların və məcburi köçkünlərin doğma yurdlarına qaytarılması ilə bağlı mötəbər beynəlxalq qurumların qəbul etdikləri qərar və qətnamələrin tələblərini Ermənistan hələ də yerinə yetirmir: "Məsələnin həlli ilə məşğul olan ATƏT-in Minsk qrupu iyirmi ildən artıq müddətdə fəaliyyət göstərməsinə baxmayaraq, ortaya heç bir səmərəli nəticə qoymayıb. Azərbaycan bölgədə sabitliyin, əmin-amanlığın təmin olunmasında, əməkdaşlığın inkişafında maraqlıdır. Bunun üçün ilk növbədə, beynəlxalq qurumların qətnamələri yerinə yetirilməli, Azərbaycanın ərazi bütövlüyü təmin edilməlidir. Ermənistan intensiv olaraq danışıqlar prosesini pozur. Ermənistan hakimiyyəti münaqişənin həllini istəmir, havadarlarının köməyi ilə torpaqlarımızı işğal altında saxlayır və qeyri-konstruktiv mövqe tutmaqda davam edir. Dünya birliyi isə işğalçı ölkəyə heç bir təzyiq göstərmir".

AŞPA sədri olmuş britaniyalı parlament üzvü Lord Rassel Conston və digər parlament üzvlərinin ölkəmizə səfərləri və məcburi köçkünlərlə görüşlərini xatırladan  Əli Həsənov eyni zamanda bu ölkənin bir çox beynəlxalq humanitar təşkilatlarının ölkəmizdə olan məcburi köçkünlərə humanitar yardımlar etdiyinə görə təşəkkürünü bildirib.
   
Qəbula görə minnətdarlığını bildirən britaniyalı diplomat siyasi, iqtisadi, enerji təhlükəsizliyi, mədəni və digər sahələrdə mövcud olan qarşılıqlı əməkdaşlığımızın daha da genişləndirilməsi işində səylərini əsirgəməyəcəyini deyib. O, həmçini iki ölkə arasında müxtəlif sahələrdə bir sıra  layihələr üzərində iş aparıldığını qeyd edib.
 
Ermənistanın hazırkı status-kvonun davam etdirməsindən təəssüfləndiyini bildirən Səfir Kerol Meri Krofts qeyd edib ki,  dünya ictimaiyyəti bu münaqişənin həllinə kömək etməlidir  və Böyük Britaniya münaqişənin sülh yolu ilə həllini dəstəkləyir.

Görüşdə həmçinin Səfirlik tərəfindən məcburi köçkün şagirdlərə müvafiq məktəb ləvazimatının  verilməsi məsələsi də müzakirə olunub.


11.01.2017 17:29:47
Oxuma sayı: 535