Daha bir metro stansiyası gələn istifadəyə veriləcək
Ölçü:


”Bakı Metropoliteni”nin “Bənövşəyi xətt” üzrə tikilməkdə olan, şərti olaraq “B3″ adlandırılan stansiyasının tikintisinin 2020-ci ildə başa çatdırılması nəzərdə tutulur.

Koordinat.az xəbər verir ki, bu barədə “Bakı Metropoliteni” QSC-nin sədr müavini Hidayət Məmmədov bildirib. Onun sözlərinə görə, hazırda həmin ərazidə təmir-tikinti işləri davam etdirilir.

“B3” metro stansiyası paytaxtın Cəlil Məmmədquluzadə küçəsində, Hərbi hospitalın yanında inşa edilir.

Qeyd edək ki, “Bakı Metropoliteni”nin hazırda 25 stansiyası, 1 elektrik deposu və 36,6 kilometr uzunluğunda 3 xətti var. “Bakı Metropoliteni” Xətlərinin Konseptual İnkişaf sxeminə əsasən gələcəkdə metropolitenin ümumi şəbəkəsi 3 mövcud – Yaşıl, Qırmızı və Bənövşəyi, həmçinin 2 əlavə yeni xətt – Mavi və Sarı xətlər olmaqla 5 xətdən, 76 stansiyadan, 6 elektrik deposundan və 119,1 kilometr metro xəttindən ibarət olacaq. Perspektivdə 51 yeni stansiyanın inşa edilməsi və 84,3 kilometr uzunluğunda metro xəttinin çəkilməsi nəzərdə tutulub.
11.06.2019 13:23:00
Oxuma sayı: 56