Nəcməddin Sadıkovun 63 yaşı tamam oldu - pensiyaya göndərilir?
Ölçü:


Azərbaycan müdafiə nazirinin birinci müavini, Silahlı Qüvvələrin Baş Qərargah rəisi, general-polkovnik Nəcməddin Sadıkovun dəftərxana rəisi general-mayor Aleksandr Vasyak və bir müddət əvvəl yaşı ilə əlaqədar ordudan təxris olunmuş, sonradan Koordinasiya İdarəsinə rəis təyin edilmiş general-leytenant Eyvaz Cəfərov işdən azad olunublar.

Koordinat.az xəbər verir ki, bu barədə "Yenicag" məlumat yayıb. Bildirilir ki, adıçəkilən şəxslər yaşları ilə əlaqədar ordu sıralarından azad edilsələr də, sonradan hərbi vəzifələrdə mülki şəxs kimi çalışıblar.

Bu gün Silahlı Qüvvələrin Baş Qərargah rəisi, general-polkovnik Nəcməddin Sadıkovun doğum günüdür. 1956-cı il may ayının 24-də anadan olan Nəcməddin Sadıkovun 63 yaşı tamam olur. Bu da o deməkdir ki, o, artıq yaşı ilə əlaqədar ordu sıralarından azad edilməlidir.

Nəcməddin Sadıkovu yalnız Azərbaycan Respublikası prezidenti İlham Əliyev sərəncamla vəzifəsində saxlaya bilər. Belə ki, qaydaya görə, 63 yaşı tamam olmuş şəxsləri hər dəfə bir il artırmaqla, iki dəfə eyni vəzifədə saxlamaq mümkündür.

Yaxın günlərdə prezident İlham Əliyevin Nəcməddin Sadıkovla bağlı sərəncam imzalayacağı gözlənilir. Ancaq bu sərəncamla hazırkı Baş qərargah rəisinin vəzifədən azad ediləcəyi, yoxsa yenidən bir il vəzifədə saxlanılacağı bilinmir.

Nəcməddin Sadıkova yaxın adamların ordu sıralarından azad edilməsi, onun da vəzifədə qalmayacağı kimi dəyərləndirilir.
24.05.2019 16:17:00
Oxuma sayı: 88