Qulu Məhərrəmli AzTV-dəki dəyişikliklər barədə: "Televiziyaya ləkə gətirənlərin bəziləri hələ postunda qalır”
Ölçü:


“AzTV sükunət halından çıxıb, müəyyən yaradıcı proses gedir. Televiziyaya peşəkar, maraqlı insanlar çalışmağa dəvət olunub: “Məsələn, mənim üçün sevindirici hal oldu ki, tanınmış rejissor Şərif Qurbanəliyev “Sabah” Yaradıcılıq Birliyinin rəhbəri təyin edildi. Bədii verilişlər üzrə peşəkar rejissor Nadir Diridağlı dəvət olunub. Ədəbi Dram Verilişlərinə isə Azər Qismət rəhbər oldu. Bütün bunları müsbət addımlar kimi qiymətləndirirəm. Hiss olunur ki, müsbət proseslər gedir. Verilişlərin də ahəngi, ruhu bir qədər dəyişib. Amma bütövlükdə AzTV-nin  dəyişdiyini iddia etmək doğru olmazdı. İndiki yaradıcılıq axtarışları hara gedəcək, kadr siyasəti necə olacaq, sədri əvəz edən gənc jurnalist Rövşən Məmmədov prosesləri hara aparacaq – bunları analiz etmək tezdir. Amma yenə də telekanal durğunluq nöqtəsindən çıxıb, müəyyən yaradıcı proseslər gedir və bu addımların çoxunu sağlam hesab edirəm”.

Koordinat.az xəbər verir ki, bunu tanınmış jurnalist, televiziya eksperti Qulu Məhərrəmli Modern.az-a açıqlamasında bildirib. Onun sözlərinə görə, AzTV-nin adına, imicinə, nüfuzuna ləkə gətirən bəzi rüşvətxor, korrupsiyanın içərisində olan, köhnə sədrin əlaltısı olan şəxslərin bəziləri kollektivdən çıxarılsa da, postunda qalanlar da var: “Hər halda biz də arzu edirik ki, dövlət televiziyamız sanballı, yaradıcı və xalqa xidmət edən şəkildə fəaliyyəti ilə seçilsin. Dövlətin qayğı göstərdiyi, kifayət qədər maliyyə ayrılan televiziyanın həm yerli, həm də xarici televiziyalarla rəqabət qabiliyyəti olmalıdır. Ancaq bu şəkildə geniş tamaşaçı auditoriyasını özünə cəlb edə bilər. Proseslərin yaxşıya doğru inkişaf etməsini arzulayırıq”.

Xatırladaq ki, bu ilin yanvar ayındaArif Alışanov AzTV-nin sədri vəzifəsindən azad edilib. Onun yerinə gənc jurnalist Rövşən Məmmədov təyin edilib. O, AzTV-dən əvvəl “Lider” TV və “İdman-Azərbaycan” telekanallarında çalışıb. Bakı Avrasiya Universitetində müəllim olaraq da fəaliyyət göstərib.  
09.04.2019 10:07:00
Oxuma sayı: 260