Odla su arasında qalmış atanın hekayəti
Ölçü:


Elşən ƏZİM

Dünən Gənəcədə ucuz kafelərdən birində nahar edirdim. Çirkli divarlar, sınıq-salxaq 4 masa, torlu pəncərələr və s. ürək bulandırsa da kababları əla idi. Belə yerlərə daha çox vuranlar gəlir. Cavan bir ata 9-10 yaşlarında iki qızla içəri daxil olanda təəccübləndim. Qızların hər ikisi mavi gödəkçə, ağ ket geyinmişdi, hər ikisinin gözlərində eynək vardı, çiyinlərində də məktəbli çantası... Düşündüm ki, uşaqlarla nahar etmək üçün Gəncədə xeyli rahat, səliqəli yerlər var. İstəməsəm belə söhbətlərinə qulaq müsafiri oldum. Məlum oldu ki, ata ilə ana ayrılıb. Ata uşaqlarını hərdən görür, hər görüşlərində də bu kafeyə gətirib doyunca yedirdir. Rüstəm İbrahimbəyovun "Nəğmə dərsi" hekayəsi yadıma düşdü. (film də var) . Xidmətçi kababları gətirdi, Bir limonad, bir stəkan da meyvə arağı qoydu masaya. Qızlardan biri ağzına kimi dolu stəkana baxıb soruşdu:
- Ata bu nədir?
- Sudur qızım.
-Ata limonad ola-ola niyə adi su içirsən?
-Limonad da içəcəm.
Qısa dialoqdan sonra ata qızlarına qulluq etməyə başladı. Lülə kababdan bircə loxma öz qabına qoydu, qalanını qızlarının qarşısındakı boşqablara yığdı. Böyük qız:
- Ata özünə az götürdün- deyib etiraz etmək istəsə də
- Adam atasının əlini geri qaytarmaz - cavabından sonra dillənə bilmədi. Sonra tikə kabab gəldi. Ata yenə qızlarını yedirtməyə çalışdı və özünə balaca bir tikə götürdü. Qızların “daha bəsdi, doymuşuq” kimi sözlərinə məhəl qoymurdu, israrla yeməklərini tələb edirdi. Bir çappa arağı başına çəkdi, tez də limonaddan bir qurtum içdi. Yenə böyük qız dilləndi:
- Ata adamlar niyə araq içən kimi tez limonad içirlər, ya da tələsik ağızlarına nəsə qoyurlar? Qız sanki bu sualıyla “içdiyinin su deyil araq olduğunu bilirəm” dedi. Bayaqdan dil-dil ötən ata bu suala cavab vermədi. Mövzunu dəyişdi. Uşaqların anasını soruşdu. Qızlar sevincək anaları haqqında danışdılar. Səsləri sevincdən cingildəyirdi. Bəlkə də elə başa düşürdülər ki, daha yaxşı danışsalar ata ilə ananın barışmağına səbəb olacaqlar. Atanın gözləri doldu, elə mənim də... Pərt halda başını bulayıb əlini cibinə saldı. Bir qom pul çıxardı böyük qıza üç onluq verdi:
- Biri sənin, biri bacının, biri də ananın. Amma o, əlinizdən almasın ha...
Evdə dördüncü şəxsin də olduğunu anladım. Əvvəl elə bildim ki, ögey atadan söhbət gedir, sonra başa düşdüm ki, ailənin dağılmasına səbəb olan qayınana var, və atanın ondan zəhləsi gedir.
- Bax ona da kabab alıb göndərəcəm, pullarınızı almasın- deyib xidmətçini səslədi. Bir stəkan da araq istədi. İki şiş lülə kabab da sifariş edib ayrı-ayrı çörəklərin arasına qoyulmasını xahiş etdi. Evə göndərəcəkdi. Hesabı ödəmək üçün ayağa qalxıb kassaya yaxınlaşdı. Böyük qız atanın getdiyini görüb tez bacısının və özünün stəkanlarındakı limonadı onun boş stəkanına doldurdu. Boşqablarındakı kabab tikələrini də onun qabına qoydu. Bacısının qəribə nəzərlərlə baxdığını görüb ona izah etməyə çalışdı:
- Biz doymuşuq, atam azca yedi, qoy qalanını o yesin, limonad da içsin, araq içir axı...
Ata qayıdıb arağı başına çəkdi, limonaddan da bir qurtum içdi. Qızların qablarını boş görüb:
- Ay mənim qoçaq balalarım, hamısını yedinizmi? Di duraq gedək- deyib sevincək ayağa qalxdı. Öz boşqabındakı tikələri görmədi.
19.11.2018 09:57:54
Oxuma sayı: 730